Fráboðanir

    Heildarætlan um vitlíki

    Arbeitt verður við heildarætlan fyri vitlíki.

    Endamálið er:
    Við ábyrgdarfullari nýtslu av vitlíki vilja vit nútímansgera samfelagið, økja um kappingarføri, styrkja okkara førleikar, og verja føroyskt mál og mentan.

    Heildarætlanin skal: 

    • Umseta visjónina til ítøkilig tiltøk tvørtur um tær tríggjar súlurnar – fólkið, málið og búskapin

    • Geva hvørjum tiltaki eigara, tíðarætlan og fígging

    • Byggja á íkast frá forkanningini og grannalondunum

    • Vera til reiðar til fíggjarlógina fyri 2027

    Tríggjar súlur: fólkið, málið og búskapurin

    Føroyar skulu vera eitt undangonguland, ið vísir, hvussu ein smátjóð við ábyrgd gagnnýtir vitlíki til at styrkja fólkið, málið og búskapin. Heildarætlanin byggir á hesar tríggjar súlurnar.

    Fólkið
    Vitlíki skal styrkja fólkið – við trygd, etikki og rættindum, fatan og førleikum og einum munadyggum almennum geira, sum tænir borgarunum.

    Málið
    Føroyskt skal vera ein sjálvgivin partur av vitlíkinum – við máltøkni, tekstgrunni og førleikum, sum varðveita og menna málið í eini talgildari øld.

    Búskapurin
    Vitlíki skal styrkja vinnu og samfelagsbúskap – við tøkniligum undirstøðukervi, kappingarføri og nýskapan, sum gera tað møguligt hjá Føroyum at vera við frá byrjanini.