Talgilding fyri øll

Talgildar tænastur verða brúktar av fólki við ymiskum førleikum og ymiskum hjálpitólum. Ein tænasta kann vera løtt at brúka hjá summum, men hava forðingar hjá øðrum. Tí er talgild atkoma ein týðandi partur av at menna tænastur, sum so nógv sum gjørligt kunnu brúka.

WCAG er ein altjóða standardur við leiðreglum fyri talgilda atkomu. Tær hjálpa teimum, sum menna heimasíður og talgildar loysnir, at taka atlit til eitt nú tekst, litir, navigatión og nýtslu við hjálpitólum. Vit mæla øllum, sum menna talgildar tænastur í Føroyum, til at taka støði í WCAG og arbeiða miðvíst eftir leiðreglunum. Talgild atkoma eigur at verða hugsað inn frá byrjan og kannast og betrast, so hvørt sum tænastan verður ment.

Føroyskt er grundarlagið undir okkara talgildu tænastum, og vit leggja stóran dent á at brúka góðan málburð í øllum okkara samskifti.

Appirnar Samleikin, Vangin og Skjáttan eru eisini á enskum, og tænasturnar á Vanganum eru tøkar á føroyskum og enskum. Flestu vegleiðingar okkara eru somuleiðis á báðum málum.

Við at bjóða loysnir og vegleiðingar á føroyskum og enskum gera vit tað lættari hjá bæði føroyingum og tilflytarum at brúka talgildu tænasturnar.

Tá ið tænastuveitarar bjóða tænastur á Vanganum, eiga teir eisini at hava sína kunning á báðum málum. Soleiðis kunnu fólk bæði brúka tænastunarnar og skilja upplýsingarnar, sum hoyra til tær.

Á Vanganum og øðrum heimasíðum eru ymisk hjálpiamboð tøk til tey, ið hava ymiskar avbjóðingar við t.d. hoyrn og sjón.

Myndin niðanfyri, er at finna inni á Vanganum og øðrum, og her kanst tú velja ymsu hjálparamboðini.

1. Knappastýring

   Allar funkur á Vanganum kunnu brúkast við knappastýring. Tað vil siga, at tú ikki nýtist brúka músina. Tú kanst heldur brúka allar funkurnar við at trýsta á knappaborðið.

2. Fá tekstirnar lisnar upp

   Fyri tey, sum hava trupulleikar við at lesa ella ikki síggja væl, er møguleiki fyri at fáa tekstirnar á Vanganum lisnar upp.

3. Litmótsetningar

   Teksturin á Vanganum er gjørdur soleiðis, at tað er kontrastur á litunum. Hetta er gagnligt fyri øll, og alneyðugt fyri tey, sum sum eru sjónveik ella litblind. Tú kanst velja, hvussu stóran litmótsetning tú vilt brúka.

4. Hálýs leinkjur

   Tú kanst hálýsa leinkir. Hetta hjálpir tær, um tú ikki sært væl og vil síggja betri, hvar tað er møguligt at trýsta á leinkjur.

5. Størri tekstur

   Tú kanst gera tekstin størri, um tú ikki sært væl.

6. Tekstfjarstøða

   Tú kanst gera fjarstøðuna á tekstinum størri.

7. Steðga livandi myndum

   Tú kanst steðga livandi myndum, sum t.d. video.

8. Hjálp til orðblind

   Tú kanst velja eina serliga skrift, sum er gagnlig fyri orðblind. Skriftin hevur eitt serstakt snið, sum ger tað lættari hjá orðblindum at lesa.

9. Vísari

   Vísarin frá músini kann gerast størri, so at hann er lættari at síggja.

Við talgildari fulltrú kann ein persónur geva einum øðrum heimild at avgreiða ávís viðurskifti fyri seg á Vanganum. Tann, sum hjálpir, brúkar sín egna Samleika, og tænastuveitarin sær, hvør hevur framt avgreiðsluna.

Soleiðis kunnu fólk fáa talgilda hjálp á ein tryggan og skipaðan hátt. Fulltrúin verður givin til ávísar tænastur, ikki til Vangan sum heild. Fulltrú verður ikki givin til Samleikan.

Les um, hvussu talgild fulltrú virkar á heimasíðuni hjá Vanganum í leinkinum niðanfyri:

Talgild fulltrú á Vanganum

Sum samfelag hava vit ábyrgd av at gagnnýta møguleikarnar í talgildu menningini.

Talgildar tænastur kunnu gera tað lættari hjá fólki at avgreiða síni viðurskifti og hjá myndugleikum at veita góða tænastu. Men fólk hava ymiskar fortreytir fyri at vera sjálvhjálpin talgilt. Tí mugu vit eisini hugsa um hjálp og aðrar leiðir til tænastu, tá ið vit menna nýggjar loysnir.

Tað er ikki krav at hava Samleikan. Fólk skulu framvegis kunna avgreiða síni viðurskifti uttan. Til dømis við at møta upp ella senda bræv. Hevur ein persónur hvørki møguleika at brúka talgildu tænastuna ella at avgreiða síni viðurskiftir á annan hátt, kann tað hava álvarsamar fylgjur fyri viðkomandi.

Vit gera greiðar vegleiðingar og veita hjálp til tey, sum vilja brúka loysnirnar. Vit skipa eisini fyri kunningarfundum um talgildar tænastur, har fólk kunnu fáa hjálp at brúka loysnirnar og kunnu seta spurningar. Ofta hava vit tænastuveitarar við, so teir kunnu greiða frá sínum tænastum og svara spurningum um tær.

Talgild inklusjón er ein felags uppgáva hjá okkum og teimum, sum bjóða talgildar tænastur. Hon skal tí vera partur av arbeiðinum frá byrjan, tá nýggjar talgildar tænastur verða mentar.

Talgildu loysnirnar eru ikki líka lættar at brúka hjá øllum. Vit vilja fegin hjálpa fólki at koma í gongd og kenna seg trygg við at brúka tær í gerandisdegnum.

Talgildir eru kunnandi fundir, har vit vísa, hvussu loysnirnar virka, og svara spurningum. Fundirnir verða hildnir hjá eldrasamstørvum, á eldratilhaldum og hjá tænastuveitarum. Ofta eru tað tey, sum skipa fyri, meðan vit koma at greiða frá og vegleiða.

Set teg í samband við okkum, um tú vilt skipa fyri einum talgildi.