Heildarætlan 2025-2027

Við einum felags myndugleika fæst sum mest burturúr landsins tilfeingi innan talgilding. Málið er at seta á stovn ein myndugleika fyri talgilding av samfelagnum. Ein felags myndugleika fyri landið, sum skal standa fyri at samskipa og samstarva um talgilding við kommunur og vinnuna, soleiðis at vit hava eina felags talgilda kós fyri samfelagið. Við støði í rundskrivi fær myndugleikin neyðugu heimildirnar at tryggja, at geirar og súlur ikki eru forðing fyri at veita borgarum og vinnu samanhangandi og effektivar talgildar tænastur.

Myndugleikin skal menna og reka felags talgilda undirstøðukervið. Hann skal standa á odda fyri at leggja ætlanir fyri talgilding av samfelagnum, samskipa yvirskipaðu átøkini, orða og seta út í kortið og seta krøv og vegleiða um, m.a. kt-arkitektur, verkætlanarleiðslu, brúkaravinsemi og gerð av nyttugreiningum og -mátingum av kt-verkætlanum.

Virksemið innan kt og talgilding hjá landi og kommunum skal samskipast betur. Við størri samstarvi og samskipan kkunnu vit gagnnýta verandi loysnir og undirstøðukervi betur og skipa fyri felags átøkum innan innkeyp, menning og rakstur. Soleiðis fáa vit meira burturúr íløgunum og skapa størri virði fyri samfelagið.

Grundarlagið fyri einum slíkum myndugleika finst í stóran mun longu í dag við virkseminum á Gjaldstovuni, har serliga Talgildu Føroyar og KT Landsins hava ognað sær førleikar og royndir at standa fyri felags almennari leiðslu innan KT og talgilding. Talan er ikki um nýggjan stovn, men í staðin at víðka um virksemið hjá Gjaldstovuni til eisini at umfata myndugleika uppgávur innan talgilding

Samskifti og veitingar til borgarar og vinnu skulu verða smidlig og trygg.

Flestu almennir stovnar og kommunur eru tøkar á Vanganum og geva borgarum eina alsamt meira samanhangandi brúkaraatferð, størri gjøgnumskygni og betri tænastu. Talgilding av heilsudátum og -tænastum verður eitt aðalmál. Tænastur til borgarar á Vanganum eru ein týðandi partur av strategiini fyri stóru kt-verkætlanina hjá Sjúkrahúsverkinum.

Skjáttan skal mennast víðari, so vit kunnu savna almenn loyvi, prógv og aðrar upplýsingar á einum stað. Við Skjáttuni fáa vit talgildu fyrimunirnar við í okkara gerandisdag og gera dagligar avgreiðslur einfaldari og smidligari.

Brúkaratferðir grundaðar á lívsstøður skulu allýsast og greinast, so vit fáa meira samanhangandi tænastur, og borgarar verða betur fyri sjálvir at avgreiða síni viðurskifti tvørtur um myndugleikar. Vitlíki kann gerast ein týðandi liður í at røkka hesum máli.

Virkið verður eitt stórt frambrot innan føroyska talgilding. Virkið skapar grundarlag fyri at menna almennar tænastur til vinnuna á sama hátt, sum vit kenna tað frá Vanganum. Vinnan skal hava einar dyr at venda sær til í talgilda samskiftinum við tað almenna. Hetta krevur eisini, at vinnan fær ein talgildan postkassa líknandi Mínboks, ið kann brúkast at samskifta við tað almenna, sínámillum og við borgarar.

Talgilding og nýggj tøkni sum heild skulu setast í verk fyri at skapa ein betri og munadyggari almennan geira. Tøknin er týðandi amboð fyri at loysa vaksandi avbjóðingina við vantandi arbeiðsmegi á alsamt fleiri fakøkjum. Tøkni kann serliga lætta um, tá talan er um einsháttaðar og tungar arbeiðsuppgávur á fyrisitingarligum økjum og innan heilsu- og eldrarøkt. Neyðugt er við nýhugsan, hvussu vælferðartænastur skulu veitast í framtíðini. Tøkni sum vitlíki (AI), tólmenni (Robotics), talukennari og tólnet (IoT) eru lykilin til, at hetta kann eydnast.

Fyritreytirnar fyri at gera nakað munagott eru góðar. Vit hava fjarskiftiskervi í heimsflokki, bæði í mun til útbreiðslu og tøkni. Talgilda undirstøðukervið er nýmótans, ment til okkara tørv. Loysnirnar lúka altjóða krøv, og verða brúktar í øllum samfelagnum. Hóast vit mangla nógv kt-fólk, so hava vit eina vælvirkandi og nýskapandi kt-vinnu við høgum fakligum førleikum. Politiskt eru stig tikin til at útbúgva fleiri kt-fólk á Setrinum.

Talan er um eina stóra uppgávu, sum krevur eitt haldgott samstarv millum myndugleikar og vinnu, har partarnir binda seg til at fremja neyðugu broytingarnar og skapa teir neyðugu karmarnar. Myndugleikar og starvsfólk skulu harumframt førleikamennast, og løgfrøðin stuðla undir ábyrgdarfullari nýtslu av nýggjari tøkni.