Í føroysku virkisskránni finnur tú upplýsingar um fyritøkur, stovnar og feløg í Føroyum.
Føroyska virkisskráin fær navnið Virkið. Her fert tú at finna upplýsingar um fyritøkur, stovnar og feløg í Føroyum.
Virkið er undir menning. Í næstum byrjar royndarkoyringin, har loysn og dátur verða góðskutryggjaðar, áðrenn skipanin verður alment tikin í nýtslu.
Við Virkinum verða upplýsingar úr almennum skráum savnaðar á einum stað. Her kanst tú lætt finna almennar upplýsingar um fyritøkur, stovnar og feløg í Føroyum, og tú kanst eisini fáa innlit í upplýsingar um títt egna virki ella felag.
Virkið skal styrkja gjøgnumskygnið í føroyska virkislendinum og gera tað lættari hjá tær at kunna teg um virkir og feløg, sum kundi, samstarvsfelagi ella íleggjari.
Tú fert eisini at kunna heinta almennar dátur úr Virkinum beinleiðis inn í egnar skipanir umvegis vevtænastu.
Soleiðis kunnu fyritøkur og stovnar brúka dáturnar í egnum arbeiðsgongdum uttan at sláa upplýsingarnar upp og flyta tær manuelt hvørja ferð.
Eitt av endamálunum við Virkinum er at skapa gjøgnumskygni í eigaraviðurskiftum, leiðslu, bygnaði og fíggjarviðurskiftum hjá føroyskum fyritøkum og felagsskapum. Atgongd til rættar og dagførdar upplýsingar styrkir álitið millum fólk, kundar, samstarvsfelagar, íleggjarar, vinnulívið og tað almenna.
Gjøgnumskygni hevur eisini týdning fyri umdømi Føroya uttanlands. Føroyar eru limur í Global Forum on Transparency and Exchange of Information for Tax Purposes og skulu tí tryggja, at upplýsingar um eigaraviðurskifti lúka altjóða krøv og standardar. Samstundis er gjøgnumskygni við til at fyribyrgja sviki og øðrum ólógligum virksemi.
Skráseting Føroya, TAKS, Hagstova Føroya og Gjaldstovan menna Virkið í felag. Talgildu Føroyar eru partur av Gjaldstovuni.
Virkið kann samanberast við Landsfólkayvirlitið, har allir føroyingar eru skrásettir við P-tali. Í Virkinum eru føroyskar fyritøkur, partafeløg, smápartafeløg, ítróttarfeløg, áhugafeløg og sjálvsognarstovnar, kommunalir og almennir stovnar skrásett við V-tali.