Við Samleikanum fáa tit eina trygga og væl kenda innritan til tykkara talgildu tænastur. Tit vita, hvør ritar inn, og kunnu tryggja, at rætti persónurin fær atgongd. Brúkarin fær samstundis eina einfalda innritan, sum hann kennir frammanundan.
Samleikin er ein trygg loysn, ið livir upp til altjóða trygdarkrøv. Tøknin byggir á tvey-faktor góðkenning. Hetta merkir millum annað, at tú skalt ígjøgnum tvey stig, tá ið tú ritar inn á eina talgilda tænastu. Hesi eru at tú:
Hevur Samleikan hjá tær fyri at góðkenna innritanina
Skrivar loynitalið, ið tú hevur valt
Samleikin kann brúkast sum app ella geymi. Samleika appir verða nógv nýttar í øðrum Norðurlondum, og hava tær havt við sær, at talið av innritanum er nógv hækkað. Flest øll hava telefonina við hondina og kunnu tí lætt rita inn á talgildar tænastur.
Um tú ikki hevur snildfon ella teldil kanst tú fáa ein geyma, við at venda tær til brúkaratænastuna á Staravegi 9 í Havn á telefon 1881.
Appin kann brúkast at rita inn á telefon, teldil og teldu. Geymin kann bara brúkast at rita inn á teldu.
Appin og geymin lúka somu høgu trygdarkrøv.
Les meira á leinkjuni niðanfyri
Øll, sum eru 13 ár ella eldri og hava p-tal og gyldugt samleikaprógv, kunnu fáa Samleikan. Søkt verður í Samleika-appini ella við at seta seg í samband við brúkaratænastuna á 1881.
Vit kanna hvørja umsókn og samanbera upplýsingarnar við Landsfólkayvirlitið og koyrikorts- ella passskránna. Soleiðis staðfesta vit, at upplýsingarnar eru rættar.
Samleikin er mentur av samtakinum Klintra / Føroya Tele.
Elektron stendur fyri at reka Samleikan og veita brúkarahjálp.
Nógv orka er løgd í navn og búmerki hjá Samleikanum. Dentur er lagdur á, at Samleikin skal verða lættur at kenna aftur, og at hann kann nýtast í øllum sløgum av samskifti.
Búmerkið ímyndar eitt eyga og ein lykil, og hvussu hesi eru samanbundin. Hetta er ein týðandi liður í Samleikanum, ið er persónligi lykilin til talgildar tænastur.
Litirnir í búmerkinum umboða norðlýsið, hvørs dansandi ljós minnir um eina himmalska stjørnulind, sum blaktrar yvir fjallatind.
Navnið er valt í eini verkstovutilgongd, har málkøn fólk og aðrir áhugabólkar viðgjørdu fleiri enn 100 navnauppskot.