Talgild rokning

Síðan 2018 hevur tað verið lógarkrav, at veitarar senda landinum talgildar rokningar. Almennir stovnar skulu samstundis tryggja, at kravið verður fylgt.

Kravið er ásett í:

• Løgtingslóg nr. 56 frá 10. mai í 2017 um talgildar rokningar

• Kunngerð nr. 130 frá 21. august í 2017 um talgildar rokningar

Fær ein almennur stovnur eina rokning við telduposti ella vanligum posti, skal stovnurin senda hana aftur til veitaran og biðja um eina talgilda rokning.

Ein stovnur kann ikki brúka møguleikan „innanhýsis skjal“ sum frávik frá lógarkravinum.

Ein talgild rokning er ein dátuberandi rokning í OIOUBL-sniði. Tað merkir, at upplýsingarnar í rokningini kunnu lesast beinleiðis av einari skipan og flytast víðari til aðra skipan, uttan at nakar skal skráseta tær av nýggjum.

OIO merkir Offentlig Information Online. OIOUBL er ein danskur standardur fyri talgildar rokningar, sum byggir á altjóða standardin UBL. UBL merkir Universal Business Language. Áður varð sniðið OIOXML brúkt.

Ein PDF-rokning, sum verður send við telduposti, er ikki ein talgild rokning.

Í Leiðslukunningarskipanini síggjast talgildar rokningar sum grá ímyndartekin og PDF-rokningar sum blá ímyndartekin undir „Skjal“.

Tá tú sendir eina talgilda rokning, fer hon beinleiðis úr skipanini hjá tær í Rokningaverkgongdina hjá landinum. Rokningin fer sostatt frá skipan til skipan, uttan at ein persónur fyrst skal taka ímóti henni og senda hana víðari.

Ein PDF-rokning krevur fleiri stig. Hon verður fyrst send við telduposti til ein almennan stovn. Eitt starvsfólk á stovninum viðger rokningina og sendir hana síðan til Gjaldstovuna. Har skal ein bókhaldari viðgera og skanna hana, áðrenn hon kemur í Rokningaverkgongdina.

Talgildar rokningar hava tí fleiri fyrimunir:

• Rokningin kemur skjótari í Rokningaverkgongdina.

• Styttri tíð gongur vanliga, áðrenn rokningin er endaliga avgreidd.

• Upplýsingarnar verða lisnar inn soleiðis, sum tú hevur skrásett tær.

• Minni vandi er fyri feilum, tí upplýsingarnar skulu ikki skrásetast av nýggjum.

• Almennir stovnar brúka minni arbeiðsorku til at viðgera og skanna rokningar.

• Stovnarnir kunnu fáa størri nyttu úr upplýsingunum í vørulinjunum.

Tú kanst senda talgildar rokningar til almennar stovnar á tveir mátar:

1. við GLN-nummari

2. í Rokningarportalinum hjá Gjaldstovuni

GLN-nummar varð áður nevnt EAN-nummar. Fyri at senda við GLN-nummari skalt tú brúka eina roknskaparskipan, sum kann senda talgildar rokningar.

Allir almennir stovnar hava sítt egna GLN-nummar. Tú skrásetur GLN-nummarið hjá stovninum saman við kundaupplýsingunum í roknskaparskipanini.

Vanliga skalt tú hava eina avtalu við Elektron ella FarPay fyri at senda talgildar rokningar við GLN-nummari. Summar roknskaparskipanir á netinum hava tó henda møguleikan innbygdan. Dømi um slíkar skipanir eru e-conomic, Dinero og Admind.

GLN-nummarið hjá almenna stovninum finnur tú á heimasíðuni hjá Gjaldstovuni.

Hevur roknskaparskipanin hjá tær ikki møguleika at senda við GLN-nummari, kanst tú brúka Rokningarportalin hjá Gjaldstovuni. Tað er ókeypis hjá veitarum at senda rokningar í portalinum.

Í Rokningarportalinum skrásetur tú neyðugu upplýsingarnar um rokningina. Tú kanst eisini viðhefta PDF-skjøl, til dømis skjalprógv ella aðrar viðkomandi upplýsingar.

Fyri at brúka Rokningarportalin skalt tú:

• hava føroyskt v-tal

• vera føroyskur veitari

• kunna vátta rokningina við einum føroyskum telefonnummari, sum byrjar við +298

Til ber eisini hjá eitt nú donskum veitarum at brúka aðrar rokningaportalar eitt nú tann hjá Sproom.